Samaya Sandesh
डडेल्धुरामा बोलेरो जिप दुर्घटना हुँदा दुई जनाको मृत्य भएको छ। चालकसहित अन्य तीन घाइते भएका प्रहरीले जनाएको छ।
भीमदत्त राजमार्गअन्तर्गत अमरगढी नगरपालिका–७ खस्र्याखानमा सु.प.प्र ०१–००१ ज १८५० नम्बरको बोलेरो जिप दुर्घटनामा परेको हो।
धनगढीबाट दार्चुलातर्फ जाँदै गरेको जिप आज बिहान करिब २ बजे सडकबाट करिब ४ सय मिटर तल खस्दा दुर्घटना भएको जिल्ला प्रहरी कार्यालय डडेल्धुराले जनाएको छ।
दुर्घटनामा ज्यान गुमाउनेमा दार्चुलाकै अपिहिमाल गाउँपालिका–१ निवासी अन्दाजी ४५ वर्षीय सुगन लोथ्याल र सोही स्थानका अन्दाजी २८ वर्षीय हनु लोथ्याल रहेका छन्।
जिल्ला प्रहरी कार्यालय डडेल्धुराका सूचना अधिकारी प्रहरी निरीक्षक भास्कर चन्दका अनुसार दुर्घटनाकै दार्चुलाको मार्मा गाउँपालिका निवासी ५० वर्षीय अमरसिंह ठगुन्ना, अपिहिमाल गाउँपालिका–१ निवासी ३५ वर्षीया सरस्वती लोथ्याल तथा जिप चालक बैतडीको डिलासैनी गाउँपालिका–२ निवासी अमृत घरेडी घाइते भएका छन्।
घाइते तीनै जनाको डडेल्धुरा अस्पतालमा उपचार भइरहेको प्रहरीले जनाएको छ।
दुर्घटनाको कारण हालसम्म खुल्न सकेको छैन। घटनाबारे थप अनुसन्धान भइरहेको जिल्ला प्रहरी कार्यालय डडेल्धुराले जनाएको छ।
जिप आफैँ अनियन्त्रित भई भिरबाट तल खसेको हो।
