Samaya Sandesh
कंचनपुर । नेपालका लागि इजरायलका राजदूत श्मुलिक एरी बासले नेपालसँग श्रम सहकार्यलाई अझ विस्तार गर्न इजरायल इच्छुक रहेको बताएका छन्।
पोखरा भ्रमणका क्रममा सरकारी प्रतिनिधि, व्यवसायी, पर्यटनकर्मी तथा सञ्चारकर्मीसँगको भेटघाटमा उनले नेपाल–इजरायल सम्बन्ध पर्यटन, कृषि, श्रम, शिक्षा, प्रविधि तथा नवप्रवर्तनका क्षेत्रमा निरन्तर सुदृढ हुँदै गएको उल्लेख गरे।
राजदूत बासले नेपाली कामदारको सुरक्षा र अवसर विस्तारका लागि थप श्रम सहकार्यसम्बन्धी समझदारी अघि बढिरहेको जानकारी दिए। साथै, कृषि र केयरगिभर लगायतका क्षेत्रमा नेपाली जनशक्तिका लागि थप रोजगारीको सम्भावना रहेको बताए।
उनले इजरायल भ्रमण गर्ने पर्यटकको संख्या बढाउन प्रत्यक्ष हवाई सम्पर्क तथा पर्यटन प्रवर्द्धन आवश्यक रहेको धारणा पनि राखे। साथै, अनुसन्धान, प्रविधि र नवप्रवर्तनमा लगानी बढाउन नेपाललाई सुझाव दिएका छन्।
इजरायल र नेपालबीच श्रम, कृषि, पर्यटन तथा आर्थिक सहकार्यलाई थप प्रभावकारी बनाउने विषयमा दुवै देशबीच निरन्तर छलफल भइरहेको जनाइएको छ।
